Бұған дейін ел тарихындағы ең ұзақ үкіметтік тоқырау (шатдаун) Дональд Трамптың алғашқы президенттік мерзімінде тіркелген еді — ол кезде үкімет 35 күнге жұмысын тоқтатқан болатын, деп хабарлайды Jambylinfo.kz BBC.com-ға сілтеме жасап.

«Шатдаунның аяқталуына аз қалды. Жақын арада бұл туралы естисіздер», — деді АҚШ президенті Дональд Трамп.

Сенаторлардың келісімге келуі үкімет жұмысын қайта жандандыру жолындағы алғашқы қадам саналады. Енді заң жобасы Сенаттан кейін Өкілдер палатасында қаралып, одан соң Трамптың қол қоюына жіберіледі. Бұл процесс бірнеше күнге созылуы мүмкін.

Қаржыландыру мәселесінде ұзақ келіспеушілік байқалды. Демократтар Medicaid бағдарламасын қысқартуды тоқтатуды және жыл соңында аяқталатын медициналық сақтандыруға берілетін салықтық жеңілдіктерді ұзартуды талап етті. Ал республикалықтар мұндай ұсыныстармен келіспеді.

Шатдаун салдарынан 1 қазаннан бастап шамамен 1,5 миллион мемлекеттік және әскери қызметкер ақысыз демалысқа жіберілді. Кейбір қызметкерлер еңбекақысыз жұмысын жалғастыруға мәжбүр болды.