Хьюстон қаласындағы америкалық MD Anderson орталығының зерттеушілері 2019 бен 2023 жылдар аралығында ем қабылдаған мыңнан астам науқастың деректерін талдады, деп хабарлайды Jambylinfo.kz BILD-қа сілтеме жасап.

Nature журналының жазуынша, иммунотерапия басталғаннан кейінгі алғашқы 100 күн ішінде мРНҚ-вакцина алған науқастардың үш жылдық өмір сүру көрсеткіші екпе салдырмағандарға қарағанда екі есе жоғары болған.

Әсіресе әсері «суық» ісіктері бар науқастарда айқын байқалған – мысалы, қуық асты безі мен ұйқы безі обыры кезінде иммундық жүйе әдетте әлсіз жауап береді. Мұндай жағдайда вакцина өмір сүру мүмкіндігін бес есеге дейін арттырған.

Зерттеу авторларының түсіндіруінше, мРНҚ-вакциналар иммундық жүйеге дабыл сигналы ретінде әсер етеді: олар қорғаныс жасушаларын белсенді етіп, қатерлі ісік жасушаларын танып, жоюға итермелейді. Ал дәстүрлі вакциналар мұндай әсер көрсетпеген.

Қазір ғалымдар мРНҚ-вакцинацияны онкологиялық науқастарды емдеудің стандартты бөлігіне айналдыру мүмкіндігін тексеру үшін ауқымды клиникалық сынақ өткізуді жоспарлап отыр.

— Бұл зерттеуде сипатталған нәтиже шынымен әсерлі, бірақ күтпеген емес. Кез келген вакцина иммундық жүйені белсендіреді, ал мРНҚ-бөлшектер мұны ерекше тиімді атқаратын сияқты, — дейді неміс иммунологы Карстен Вацль.