Суару маусымына дайындық: 526 шақырымнан астам ирригациялық канал тазартылды
Бұл туралы Су ресурстары және ирригация министрлігінің баспасөз қызметі мәлімдеді.
Жыл басынан бері суару маусымына дайындық мақсатында «Қазсушар» РМК 526 шақырымнан астам ирригациялық каналда механикалық тазалау жұмыстары жүргізілді, деп хабарлайды Jambylinfo.kz
Су ресурстары және ирригация министрі Нұржан Нұржігітов вегетация кезеңіне дайындық мәселелері бойынша аппарат кеңесін өткізді.
Бүгінге дейін тазартылған каналдардың 355 шақырымы Түркістан облысында, 40,5 шақырымы Қызылорда облысында, 41,9 шақырымы Жетісу облысында, 68,7 шақырымы Жамбыл облысында, 20,4 шақырымы Алматы облысындағы Д. Қонаев атындағы Үлкен Алматы каналы филиалының қарауында.
Жалпы, биыл «Қазсушар» РМК-ның он филиалының қарамағындағы 2211,8 шақырым каналды механикалық әдіспен тазарту жоспарланып отыр. Олардың қатарында Шығыс Қазақстан, Павлодар, Абай және Ұлытау облыстарындағы филиалдар, сондай-ақ Қ. Сәтбаев атындағы канал филиалы бар.
Айта кетейік, соңғы 2,5 жылда «Қазсушар» РМК күшімен 3,5 мың шақырымнан астам ирригациялық канал тазартылды.