2025 жылдың қаңтар–шілде айларында елімізде 608,8 мың тонна ет өндірілді, деп хабарлайды Jambylinfo.kz 

Оның ішінде 205,7 мың тоннасы сиыр етіне тиесілі. Бұл көрсеткіш өткен жылмен салыстырғанда 1,8%-ға жоғары.

Соңғы уақытта қоғамда сиыр еті бағасының өсуі мен нарықтағы тапшылық туралы алаңдаушылық байқалған еді. Дегенмен, ресми деректер саладағы жағдайдың тұрақты екенін дәлелдеп отыр.

Мал шаруашылығындағы өсім

Шілде айының соңындағы мәлімет бойынша, Қазақстанда ірі қара мал саны 8,7 млн басқа жеткен. Оның ішінде 4,5 млн-ы сиыр (+3,1%). Бұзаулардың саны 2,7 млн басқа дейін өсіп, бір жыл ішінде 17,9%-ға артқан. Бұл алдағы уақытта өндіріс көлемін одан әрі ұлғайтуға мүмкіндік береді.

Баға мен негізгі факторлар

Қазіргі таңда өндірушілерден ірі қара малдың тірідей салмақтағы көтерме бағасы 2400–3100 теңге/кг аралығында. Бөлшек саудада ет 3000–3700 теңге/кг шамасында сатылуда.

Бағаның көтерілуіне бірнеше ішкі факторлар әсер етуде:

селекциялық-асыл тұқымдық жұмысты субсидиялау тоқтатылды;

энергия ресурстары қымбаттады (электр +11,3%, газ +15,9%, су +96%-ға дейін);

жем-шөп, жанар-жағармай, ветеринарлық препараттардың құны артты;

агроөнеркәсіп кешенінде жалақы көтерілді;

жеткізу тізбегіндегі делдалдардың ықпалы байқалады.

Соған қарамастан, ет өндірісі өндірушілер үшін әлі де табысты болып отыр.

Экспорт көлемі артты

Қаңтар–маусым аралығында Қазақстан 16,1 мың тонна сиыр етін экспорттады. Бұл өткен жылмен салыстырғанда 2,4 есе көп. Негізгі сатып алушы елдер – Өзбекстан, Тәжікстан, Қырғызстан, Қытай және БАӘ. Экспорттың өсуі отандық өнімнің сапасы мен бәсекеге қабілеттілігін айқындайды.

Мемлекеттік қолдау

Қазіргі таңда бордақылау алаңдарының жүктемесі 35–40% шамасында. Бұл көрсеткішті арттыру мақсатында 2025 жылдың 1 тамызынан бастап жылдық 5%-бен 12 айға жеңілдетілген кредит беру бағдарламасы іске қосылды. Бағдарламаға 50 млрд теңге бөлініп, жас малды, жем-шөпті, жанар-жағармай мен қажетті жабдықты сатып алуға қаржы бағытталуда. Осы шараның нәтижесінде бордақылау алаңдарының жүктемесі 60%-ға дейін жеткізіледі деп күтілуде.

Осылайша, ет өндіру саласында тұрақты өсім байқалады. Бағаның белгілі бір деңгейде қымбаттауы ішкі факторларға байланысты болғанымен, мемлекет тарапынан қолдау шаралары ұсыныстың азаюына емес, артуына ықпал етіп отыр. Бұл Қазақстанның азық-түлік қауіпсіздігін қамтамасыз етіп қана қоймай, саладағы тұрақты дамуға жаңа мүмкіндіктер ашады.