Әлемге әйгілі кәсіпкер Илон Маск АҚШ-тың федералдық сотына арыз түсіріп, Apple мен OpenAI-ды жасанды интеллект саласында бәсекелестікті шектеді деп айыптады, деп хабарлайды Jambylinfo.kz 

Масктың xAI стартапы сотқа жолдаған материалдарында аталған екі компанияның нарықтағы жетекші орындарды өзара иемденіп, жаңа ойыншылардың еркін дамуына кедергі келтіргенін алға тартады. Әсіресе, Apple-дің OpenAI-мен жасасқан ерекше серіктестігі OpenAI-ға артықшылық беріп, бәсекелес қосымшалардың App Store арқылы таралуына шектеу қойғаны айтылды.

xAI келтірілген залалды миллиардтаған доллар көлемінде бағалап, өтемақы талап етуде. Масктың сөзінше, пайдаланушылардан жоғары баға алғанына және жақсы пікірлерге ие болғанына қарамастан, Apple оның Grok атты чат-ботын өз сервистік ұсыныстарына қоспаған.

OpenAI өкілдері бұл айыптауды Масктың компанияға қысым көрсету әрекетінің жалғасы деп бағалады. Ал Apple әзірге ресми түсініктеме берген жоқ.

Заңгерлердің пайымынша, смартфондар нарығындағы Apple-дің үстемдігі Масктың пайдасына жұмыс істеуі ықтимал. Дегенмен, компания өз серіктестігін қауіпсіздік пен техникалық интеграцияға негізделген бизнес-шешім ретінде қорғап шығуы мүмкін.

Сарапшылар бұл істі АҚШ-та жасанды интеллектке қатысты алғашқы ауқымды антимонополиялық процесс ретінде бағалап отыр. Олар оның нәтижелері болашақта саланы құқықтық тұрғыда реттеудің негізгі тәжірибесіне айналуы мүмкін деп есептейді.