Батыс Қазақстан облысының Ақжайық ауданында Киров су қоймасына жүргізіліп жатқан күрделі реконструкция жұмыстары соңғы кезеңге таяды, деп хабарлайды Jambylinfo.kz 

Бұл нысан 58 жылда алғаш рет жаңартылып отыр.

Жоба аясында ұзындығы 8 шақырымнан асатын «Көшім» каналы мен 3 шақырымдық су қоймасы бөгеті қалпына келтірілуде. Сонымен қатар Первомай, Бударин және Киров–Чижин каналдары жөнделіп жатыр. Бұдан өзге 2,2 шақырымдық екі электр желісі мен 3,77 шақырым сыртқы жарықтандыру жүйесі тартылып, бейнебақылау, автоматтандырылған ескерту жүйелері және бақылау-өткізу пункттері орнатылуда.

«Жоба жүзеге асқан соң Киров су қоймасының беріктігі артып, тұтынушыларға суармалы су үздіксіз беріледі. Реконструкция нысанның сыйымдылығын ұлғайтып, оның функционалдық мүмкіндіктерін жақсартады. Нәтижесінде Батыс Қазақстан облысының 12 мың гектардан астам егістік алқаптары сумен қамтамасыз етіледі», – деді Су ресурстары және ирригация министрі Нұржан Нұржігітов.

Киров су қоймасы 1967 жылы пайдалануға берілген. Жалпы сыйымдылығы – 62,9 млн текше метр. Бұл нысан Орал–Көшім суару және суландыру жүйесінің маңызды бөлігі саналады.