Биыл елімізде 93 мың білім гранты бөлінеді

Бұл туралы ҚР Премьер-министрінің орынбасары Ермек Көшербаев Үкіметте өткен баспасөз мәслихатында мәлімдеді, деп хабарлайды Jambylinfo.kz 

Оның айтуынша, гранттар санына магистратура мен докторантура бағдарламалары да кіреді.

Баспасөз жиынында вице-премьер Мемлекет басшысының білім беру саласын жетілдіру жөніндегі тапсырмалары аясында атқарылып жатқан бірқатар жұмыстарға тоқталды.

Вице-премьер жыл басынан бері еліміз бойынша 13 мың орындық 172 балабақша ашылғанын хабарлады. Соның нәтижесінде балабақшағы кезек азайып келеді.

Мемлекет басшысының тапсырмасына сәйкес 1,7 млн оқушы тегін ыстық тамақ ішеді.

Олардың ішінде әлеуметтік осал топтардан 99 мың бала бар. Оларды қолдауға 18,4 млрд теңге бөлінді. 

Тамақтанудың жаңа стандарты енгізілді: көкөністер көп, қант аз, зиянды тағамдар алынып тасталды.

«Ұлттық қор – балаларға» бағдарламасы бойынша 6,8 млн балаға ақшалай қаражат аударылды. Олар оны болашақта білім мен тұрғын үйге пайдалана алады.

Мектептердің құрылысы мен қайта жаңғырту жұмыстары жалғасуда. Соңғы екі жылда 388 мың орындық 274 жаңа мектеп ашылды. Оның ішінде «Жайлы мектеп» ұлттық жобасы аясында - 115 мектеп бар. Тағы 177 мектептің құрылысы жүруде.

Студенттік стипендиялар мен колледждерді қаржыландыру екі есе өсті.

Биыл ЖОО-ға түсу үшін магистратура мен докторантураны қоса алғанда 93 мың грант бөлінеді.

Жетекші шетелдік университеттердің 24 филиалы ашылды.

Жаңа жатақханалардың іске қосылуының нәтижесінде орын тапшылығы 72%-ға қысқарды. Нәтижесінде қазіргі уақытта бұл мәселе шешіліп келеді. Бұл жұмыстар жалғасын табатын болады.