Денсаулық сақтау министрлігі педофилия үшін сотталғандарға химиялық кастрация қолдану ережелеріне өзгеріс енгізді, деп хабарлайды Jambylinfo.kz 

Тиісті бұйрық 2025 жылдың 17 қазанынан бастап күшіне енеді.

Жаңа тәртіпке сәйкес, кәмелетке толмағандарға қарсы жыныстық қылмыс жасаған адамдарға химиялық кастрация бостандыққа шығарылуына алты ай қалғанда жүргізіледі.

Оған дейін колония әкімшілігі сотқа сотталған адамға сот-психиатриялық сараптама тағайындау үшін құжаттарды жолдауы қажет.

Министрлік түсіндіргендей, бұл шара есі дұрыс, бірақ психикалық ауытқуы бар тұлғаларға ғана қолданылады. Ал сот шешімімен мәжбүрлі емдеуге жіберілгендерге химиялық кастрация қолданылмайды.