Лондонда өткен бокс кешінде британдық Дензел Бентли кезекті жеңісіне қол жеткізіп, WBO нұсқасы бойынша уақытша әлем чемпионы атанды, деп хабарлайды Jambylinfo.kz 

Ол венесуэлалық Эндри Саавердамен жұдырықтасып, жетінші раундта қарсыласын техникалық нокаутпен жеңді. Жекпе-жек барысында Бентли айқын басымдық танытып, төреші кездесуді мерзімінен бұрын тоқтатуға мәжбүр болды.

Осы жеңістен кейін британдық боксшы үшін келесі маңызды кезең – толыққанды чемпиондық атаққа талас. Бұл үшін ол қазақстандық Жәнібек Әлімханұлымен шаршы алаңда жолығуы тиіс.

Айта кету керек, екі боксшы бұған дейін де кездескен. 2022 жылдың қараша айында өткен жекпе-жекте Жәнібек Әлімханұлы төрешілер шешімімен жеңіске жеткен болатын.

Қазіргі таңда қазақстандық боксшы рингке оралуын күтуде. Ол 2025 жылы Эрисланди Ларамен жекпе-жек алдында допинг қолданғаны үшін жазаланып, IBF чемпионы атағынан айырылған еді. Сонымен қатар WBO ұйымы оны бір жылға спорттан шеттеткен.

Алдын ала мәлімет бойынша, Әлімханұлының дисквалификация мерзімі биыл желтоқсан айында аяқталады. Осыдан кейін оның рингке қайта оралып, Бентлимен реванш өткізуі әбден мүмкін.