Іс-шара барысында көші-қон қызметінің қызметкерлері заңсыз еңбек қызметін атқарған немесе тиісті құжатсыз жүрген шетелдік азаматтарды анықтады, деп хабарлайды Jambylinfo.kz 

Құқық бұзушылардың бір бөлігі қабылдау-тарату орнына жеткізіліп, бірқатар факті бойынша әкімшілік шара қолданылды. Екі күн ішінде 60-тен астам адам көші-қон заңнамасын бұзғаны үшін жауапкершілікке тартылды, оның ішінде 11 шетелдік Қазақстан Республикасының аумағынан шығарылды.

Сонымен қатар тіркеусіз немесе жеке басын куәландыратын құжатсыз жүрген тұлғалар, сондай-ақ шетелдік жұмыс күшін тарту ережелерін бұзған жұмыс берушілер анықталды. Жүргізілген тексеру локалдық сипатта болып, алдағы уақытта қаладағы барлық аудандарда кезең-кезеңімен ұйымдастырылатын болады.

«Мақсатымыз – заң талаптарын сақтайтын азаматтарға кедергі келтірмей, қоғамдық қауіпсіздікке қауіп төндіретін құқық бұзушылықтарды анықтау. Көші-қон заңнамасын сақтау – тәртіп, қауіпсіздік және ел заңдарына құрмет мәселесі», – деді Алматы қаласы полиция департаменті көші-қон қызметі басқармасының бастығы Еркін Амантаев.