«Келешек мектептер» жобасы еліміздің білім беру жүйесін жаңа сапалық кезеңге шығаруға бағытталған маңызды стратегиялық бастамалардың бірі болып табылады. Бұл жоба аясында соңғы жылдары еліміздің көптеген өңірлерінде заман талабына сай инфрақұрылыммен жабдықталған, цифрлық технологияларды кеңінен қолданатын және оқушылардың жан-жақты дамуына жағдай жасайтын жаңа білім нысандары бой көтеріп келеді. Соның ішінде Жамбыл облысында атқарылып жатқан жұмыстардың көлемі ерекше назар аударады, деп хабарлайды Jambylinfo.kz SilkWay телеграм арнасына сілтеме жасап.

Өңірде 2023 жылы 7 мектептің құрылысы басталып, бұл білім беру саласындағы инфрақұрылымдық жаңарудың нақты қадамдарына айналды. Сол мектептердің ішінде 2024 жылы үшеуі толық аяқталып, балалардың игілігіне берілді. Байзақ ауданында ашылған жаңа мектеп ауылдық жерде сапалы білімге қолжетімділікті арттырса, Тараз қаласының Бәйтерек және Ұлы дала мөлтек аудандарында ашылған екі ірі білім ошағы қалалық оқушылардың орын тапшылығына қатысты мәселелерді айтарлықтай жеңілдетті.

2025 жылы Ұлы дала мөлтек ауданында 2000 орындық заманауи мектептің пайдалануға берілуі – өңірдің білім инфрақұрылымындағы ең ірі оқиғалардың бірі болды. Бұл мектеп қаладағы демографиялық өсімге байланысты туындаған орын жетіспеушілігін азайтып қана қоймай, жаңа білім стандарттарына толық сәйкес келетін кең, жарық кабинеттермен, ғылыми зертханалармен, ІТ және робототехника бөлмелерімен жабдықталды. Мұндай мүмкіндіктер оқушылардың оқу процесін қызықты әрі нәтижелі етуге ықпал етіп, олардың шығармашылық және ғылыми қабілеттерін дамытуға кең өріс ашты. 2025 жылдың қазан айында Қордай ауданының Қарасу және Қаракемер ауылдарында тағы екі жаңа мектеп ашылып, ауылдағы балалар үшін бұрын болмаған жаңа мүмкіндіктер туындады. Ауылдық аумақтарда осындай заманауи мектептердің салынуы білім сапасын айтарлықтай арттырып, ауыл мен қала арасындағы білім беру айырмашылығын қысқартуға мүмкіндік беруде. Сонымен қатар жыл соңына дейін Тараз қаласында тағы бір жаңа мектептің құрылысы аяқталып, өңірдегі мектептер желісі одан әрі жаңартылмақ.

Жаңа мектептердің басты ерекшелігі – олардың тек әдемі ғимарат немесе жаңа парталармен шектелмейтіндігі. Бұл мектептерде жаңартылған білім беру мазмұны тиімді енгізіліп, оқыту әдістері жаңа форматта жүзеге асырылуда. Мұғалімдер топтық жұмыс, зертханалық тәжірибелер, жобалық оқыту секілді инновациялық тәсілдерді жиі қолданады. Цифрлық құралдар мен интерактивті тақталар оқу процесін жандандырып, оқушылардың ақпараттық сауаттылығын арттыруға бағытталған. Инклюзивті білім беруге арналған арнайы бөлмелер мен ресурстық орталықтар да ашылып, мүмкіндігі шектеулі балалардың сапалы білім алуы үшін қолайлы жағдай жасалған.

Осы өзгерістердің нәтижесі ретінде жаңа мектептердің оқушылары республикалық деңгейде жоғары жетістіктерге қол жеткізуде. Олар пәндік олимпиадаларда математика, физика, биология, қазақ тілі және басқа да пәндер бойынша жүлделі орындарға ие болып, облыстың беделін арттыруда. Ғылыми жобалар байқауларында инженерия, ІТ, экология салалары бойынша ұсынылған жобалар жоғары бағаланып, бірнеше оқушының жұмыстары республикалық үздік ондыққа енді. Робототехника, инновациялық идеялар мен цифрлық технологиялар бағытында да жаңа мектептердің шәкірттері айтарлықтай жетістік көрсетіп, түрлі республикалық байқаулардан жүлделі оралуда. Спорт пен өнер саласында да жаңа мектептердің тәрбиеленушілері белсенділік танытып, республикалық деңгейде жеңістерге қол жеткізіп жүр.

Ата-аналар тарапынан да жаңа мектептерге деген сенім артып келеді. Олар оқу кабинеттерінің кеңдігі мен жарықтығын, мұғалімдердің жұмысына деген жауапкершілігін, балалардың қауіпсіздігіне ерекше көңіл бөлінетінін, сондай-ақ жаңа мектептерде үйірмелердің көптігін ерекше атап өтуде. Мұның бәрі оқушылардың білім алуға деген қызығушылығын арттырып, олардың тұлғалық дамуына оң әсерін тигізіп отыр.

Қорыта айтқанда, «Келешек мектептері» жобасы өңірдің білім беру жүйесіне үлкен серпіліс әкелді. Жаңа мектептер балаларға жайлы, қауіпсіз және заманауи орта ұсынып қана қоймай, олардың республикалық деңгейде бәсекеге қабілетті болуына мүмкіндік жасап отыр. Алдағы жылдары бұл бастама өз жалғасын тауып, жаңа мектептердің саны артып, оқушылардың жетістігі бұдан да жоғарылай беретініне сенім мол.