Таразда Отан қорғаушылар күніне орай «Айбынды елдің ұрпағы» атты әдеби кеш өтті

7 мамыр – Отан қорғаушылар күніне орай Жамбыл облыстық әмбебап ғылыми кітапханасының ұйымдастыруымен «Айбынды елдің ұрпағы» атты әдеби-мерекелік кеш өтті, деп хабарлайды Jambylinfo.kz 

Тағылымды шара Жамбыл облысы қорғаныс істері жөніндегі департаментінің акт залында ұйымдастырылып, ел қауіпсіздігін қамтамасыз етіп жүрген ер азаматтарға құрмет көрсетуге арналды.

Кеш салтанатты түрде Қазақстан Республикасының Мемлекеттік Әнұранымен ашылып, Отан алдындағы адал қызмет пен азаматтық борыш тақырыбы кеңінен қамтылды. Іс-шара барысында департамент басшылығы құттықтау сөз сөйлеп, әскери қызметтің маңыздылығына, ел тыныштығын сақтаудағы жауапкершіліктің жоғары екеніне ерекше тоқталды.

Мерекелік кештің мазмұны терең әрі тағылымды болды. Қатысушылар назарына патриоттық бағыттағы арнайы бейнеролик ұсынылып, ел қорғаған батырлар мен бүгінгі әскери қызметкерлердің ерлігі дәріптелді. Сонымен қатар, кітапхана қызметкерлері дайындаған әдеби композициялар, патриоттық өлеңдер мен әндер кештің көркін аша түсті.

Шара барысында жас буын өкілдері де белсенділік танытып, өз өнерлерін ортаға салды. Бұл өз кезегінде ұрпақтар сабақтастығын көрсетіп, жастардың бойында елжандылық қасиеттерді қалыптастыруға ықпал етті.

Сондай-ақ, мереке аясында «Отан қорғау – қасиетті парыз» тақырыбында кітап көрмесі ұйымдастырылып, онда батырлар ерлігі, әскери тарих және тәуелсіздік жолындағы күрес туралы құнды әдебиеттер көпшілік назарына ұсынылды. Көрме келушілерге ерекше әсер қалдырып, тарихи танымды тереңдетуге мүмкіндік берді.

Кеш соңында ұжым атынан ер азаматтарға құрмет көрсетіліп, сый-сияпат табысталды. Қатысушылар мұндай мазмұнды шаралардың маңыздылығын атап өтіп, ұйымдастырушыларға алғыстарын білдірді.

Жалпы, «Айбынды елдің ұрпағы» атты әдеби кеш – Отан қорғаушыларға деген құрмет пен ризашылықтың жарқын көрінісі болды. Мұндай іс-шаралар ел бірлігін нығайтып, жас ұрпақты отансүйгіштікке тәрбиелеуде ерекше рөл атқарады.