Жамбыл облысында “Заң және тәртіп” идеологиясын насихаттау мақсатында іс-шара өтті
Іс-шара қатысушылардың белсенді пікір алмасуымен аяқталып, жастардың құқықтық мәдениетін дамытуға оң әсерін тигізді.
Қазақстан Республикасы Президенті Әкімшілігі Басшысының 20 қазан күнгі кеңес хаттамасында берілген тапсырмаларды орындау шеңберінде, 2024 жылдың 26 қарашасында Жамбыл облысы бойынша ҚАЖ департаментіне қарасты №58 мекемеде жастар арасында идеологиялық-профилактикалық бағыттағы маңызды іс-шара ұйымдастырылды.
Шараның негізгі мақсаты — жастардың құқықтық мәдениетін арттыру, заңға құрмет сезімін қалыптастыру, қылмыстың алдын алу және “Заң және тәртіп” идеологиясын кеңінен насихаттау.
Іс-шараға М.Х. Дулати атындағы Тараз мемлекеттік университетінің білімгерлері, университеттің аға оқытушысы әрі магистр-психологы А.Т. Абдрахманова және ҚАЖ департаментінің қызметкерлері қатысты. Қатысушылар бірлесе отырып құқықтық профилактика мәселелерін талқылап, жас буынға заңсыз әрекеттердің салдары, құқықтық жауапкершілік, құқықтық сана мен тәртіп мәдениетінің маңызы туралы жан-жақты ақпарат берді.
Психолог маман жастармен мотивациялық және тәрбиелік әңгімелер өткізіп, олардың ой-пікірлерін тыңдап, құқықтық сауаттылық пен жауапкершілік дағдыларын нығайтуға бағытталған тренинг элементтерін қолданды.
ҚАЖ департаменті қызметкерлері мекеменің жұмысы, жазасын өтеу жүйесіндегі тәртіп пен талаптар, сондай-ақ қоғамдағы құқықтық тәртіпті сақтаудың өзектілігі жөнінде түсіндіру жұмыстарын жүргізді.