Жамбыл облысында қоғамдық қауіпсіздікті күшейтуге, қылмыстың алдын алуға және кез келген құқық бұзушылыққа «мүлдем төзбеушілік» қағидатын орнықтыруға бағытталған «Құқықтық тәртіп» жедел-профилактикалық іс-шарасы өтуде, деп хабарлайды Jambylinfo.kz 

Рейд барысында басты назар әкімшілік құқық бұзушылықтарды уақытында анықтап, олардың жолын кесуге, сондай-ақ қылмыстардың алдын алуға аударылуда. Сонымен қатар профилактикалық есепте тұрған азаматтардың тұрғылықты жерлері тексеріліп жатыр. Бұрын сотталғандар, шартты түрде сотталғандар және құқық бұзушылық жасауға бейім тұлғалар ерекше бақылауда.

Бұған қоса, көші-қон заңнамасының сақталуы да қатаң қадағаланып отыр. Шетел азаматтары мен оларды қабылдаушы тараптар тексеріліп, заңсыз болу, тіркеу талаптарын бұзу және еңбек қызметіне қатысты заңбұзушылықтар анықталуда.

Сондай-ақ полиция қызметкерлері халық арасында құқықтық мәдениетті көтеру және құқық бұзушылықтарға төзбеушілік көзқарасты қалыптастыру мақсатында түсіндіру жұмыстарын жүргізуде.