Абай Құнанбайұлының мерейтойына арналған ауқымды конференция өтті
Жиынға түрлі ЖОО өкілдері қатысты
Бүгін Тараз Мемлекеттік университетінде қазақтың ұлы ақыны, ағартушы философ Абай Құнанбайұлының туғанына 180 жыл мерейтойы аясында «салауатты сана мен мәдениет: «ұлттық дәстүрлер мен психологияның ұрпақ тәрбиесіне ықпалы» атты халықаралық ғылыми-тәжірибелік конференциясы өтті, деп хабарлайды Jambylinfo.kz
Аталған ауқымды жиынға шетелдік және республикадағы бірнеше жоғары оқу орнының ғалымдары, түрлі ұйым өкілдері, құқық қорғау саласының мамандары да қатысты.
Конференция басталмас бұрын “Дулати жастары” студенттік театры ақынның қара сөздерін оқып, шығармашылығын насихаттады.
Пленарлық отырыстың кіріспе сөзінде «Мәдениет және өнер» кафедрасының меңгерушісі, ҚР мәдениет қайраткері, профессор Айгүл Қабиева Абайдың феномендік тұлғасына тоқталып, Абайдың қазақ жұртына ғана емес, әлемдік рухани өркениеттік тұлғаға айналғанын атап өтті.
Жиында бірқатар тұлға баяндама жасап, мәңгілік адамзаттық мәселелердің өзегін қозғаған ұлы ақынның шығармашылығы түркі халықтары үшін де маңызды мұра екенін айтты.
Сонымен қатар ақынның шығармашылығының шетел тілдеріне аударылуы, оның ішінде түркі тіліне аударылудың маңыздылығына тоқталды.
Халықаралық конференцияда Абай шығармаларын білім беру жүйесінде енгізудің жаңа әдістері де ортаға салынды.