Тараз қаласы №23 орта мектебінде Мемлекеттік Рәміздерді Заңнама талаптары аясында пайдалану және қолдану бойынша облыстық семинар өтті, деп хабарлайды Jambylinfo.kz 

Облыс әкімдігінің ақпарат және қоғамдық даму басқармасының бас маманы Ш. Қашқынбек ҚР Мемлекеттік рәміздерін дұрыс пайдалану және қолдану, мемлекеттік ұйымдарда бірінші басшылардың дербес жауапкершілігін арттыру бойынша жұмыс тәжірибесімен бөлісіп, әдістемелік көмек көрсетті.

«Өскелең ұрпақ бойында отансүйгіштік қасиетті арттыру, патриоттыққа тәрбиелеу – бүгінгі күннің басты талаптарының бірі. Бұл ретте, мемлекеттік рәміздердің алатын орны өте зор. Рәміздеріміз – әрбір мемлекеттік айшықты белгісі, тәуелсіздігіміздің тұғыры болып саналады. Осы бағытта Тараз қаласы әкімдігімен бірлесіп мемлекеттік мекеменің жауапты мамандарына семинар өткізілді. Облыста мемлекеттік рәміздердің пайдаланылуы мен қолданылуы тұрақты бақылауда. Облыс әкімдігі жанынан құрылған комиссия тұрақты жұмыс жасайды. Жыл сайын облыс әкімдігінің ақпарат және қоғамдық даму басқармасы тарапынан Тараз қаласы мен аудандардағы мекемелерге зерделеу жүргізіледі. Комиссия отырысы жылына 2 рет өткізіліп, зерделеу нәтижесі қаралады. Анықталған кемшіліктер бойынша шара қолданылып, түсіндіру жұмыстары жүргізіледі», – деп атап өтті Ш. Қашқынбек.

Сондай-ақ, семинар барысында «ҚР Мемлекеттік рәміздері туралы» Заңы, ҚР Үкіметінің 2007 жылғы 2 қазандағы №873 қаулысы және өзге де заңнама нормалары түсіндірілді.

«Заңнама талаптарына сәйкес, мемлекеттік мекемелер мен ұйымдарда Ту мен Елтаңба тігіліп, Мемлекеттік Гимннің мәтіні орналастырылады. Тәуліктің қараңғы мезгілінде мемлекеттік рәміздер міндетті түрде жарықтандырылуы тиіс. Стандарт талаптарына сәйкес келмейтін Рәміздер бір күннің ішінде ауыстырылуға жатады. Мемлекеттік Рәміздерді заңнама талаптарын бұза отырып пайдалану ҚР Әкімшілік құқық бұзушылық кодексінің 418 және 458 баптары, Қылмыстық кодекстің 372-баптары бойынша айыппұл және өзге де шаралар қабылдауға алып келеді», – деді Ш. Қашқынбек.