Қордай ауданы аумағында орналасқан Гвардейский қалашығындағы 40-шы Отар әскери базасында және Т. Рысқұлов ауданы №03811, №42062, №85395, №10216 КА әскери бөлімдердің жеке құрамы мен сарбаздар белгіленген тәртіпке сәйкес өз таңдауларын жасап, дауыс беру процесіне белсенді қатысты, деп хабарлайды Jambylinfo.kz 

Дауыс беру шарасы заң талаптарына толық сәйкес ұйымдастырылды. Әскери қызметшілердің еркін әрі ашық түрде дауыс беруі үшін барлық қажетті жағдайлар жасалып, дауыс беру учаскелері арнайы талаптарға сай жабдықталды. 

Әскери қызметшілер үшін мұндай қоғамдық-саяси іс-шараларға қатысу – тек құқық қана емес, сонымен қатар үлкен жауапкершілік. Олар ел тыныштығын күзетіп қана қоймай, мемлекет болашағына қатысты маңызды шешімдерге де белсенді түрде қатысатынын көрсетті. Сарбаздардың айтуынша, дауыс беру – әрбір азаматтың елдің даму бағытын айқындауға қосатын үлесі.

Әскери қызметшілер кезекпен келіп, белгіленген рәсімдерді сақтай отырып дауыс берді. Бұл ретте учаске комиссиясының мүшелері барлық санитарлық, құқықтық және ұйымдастырушылық талаптардың орындалуын қамтамасыз етті.

Сарбаздардың белсенділігі олардың ел болашағына деген жауапкершілігін айқын көрсетеді. Әскер қатарындағы жастар өз таңдауларын жасап, мемлекет тағдырына қатысты маңызды науқаннан тыс қалмайтынын дәлелдеді. Бұл – олардың азаматтық ұстанымы мен отансүйгіштік рухының айқын көрінісі.

Қордайлық сарбаздардың белсенділігі елдің тұрақты дамуына деген сенімді нығайтып, олардың қоғам өміріндегі маңызды рөлін тағы бір мәрте көрсетті.