26 желтоқсанға қараған түні Ақтөбе облысы Шалқар ауданына қарасты Шетырғыз ауылдық округінің аумағында, Қаратоғай ауылы маңында 1983 жылы туған малшының жоғалуына байланысты іздестіру-құтқару жұмыстары жүргізілді, деп хабарлайды Jambylinfo.kz 

Алдын ала мәлімет бойынша, азамат шаруа қожалығының аумағынан жаяу шығып, Шалқар қаласы бағытына бет алғаннан кейін хабар-ошарсыз кеткен. Онымен мобильді байланыс орнату мүмкін болмады.

Іздестіру шараларына Төтенше жағдайлар министрлігінің, полиция департаментінің күштері мен құралдары, ауыл құтқарушылары, сондай-ақ шаруа қожалығының қызметкерлері жұмылдырылды.

Нәтижесінде бүгін таңертең жоғалған азамат іздестіру тобы арқылы Сарысоқы ауылынан шамамен 2 шақырым қашықтықта табылды. Ер адамның жағдайы қанағаттанарлық, медициналық көмекке мұқтаж емес.