Астанада мүмкіндігі шектеулі жандардың атынан жалған автокредиттер рәсімдеген қылмыстық топтың жолы кесілді, деп хабарлайды Jambylinfo.kz 

Тергеу мәліметінше, күдіктілер әлеуметтік осал азаматтарды "бағдарламаға қатысасың", "қосымша табыс табасың" деп алдап, несиені өз атына рәсімдеуге көндірген. Құжаттарға қол қойған адамдар алданғанын кеш білген – нәтижесінде олар көліксіз қалып, қомақты қарыздың астында қалған.

Келтірілген залалдың жалпы сомасы 250 миллион теңгеден асып кеткен. Бұл қаражаттың бәрі қылмыстық топ мүшелерінің жеке қажетіне жұмсалған.

Алаяқтықты ұйымдастырушылар ұсталып, қылмыстық ұйым құру және алаяқтық бабымен сотқа берілді.