Бүгін Отбасы банк «Наурыз 2026» бағдарламасына қатысушылардың толық тізімін жариялады, деп хабарлайды Jambylinfo.kz 

Қатысушылар 2026 жылдың 6 сәуірі мен 12 мамыры аралығында Отбасы банкте несиеге өтінім бере алады. Несие мақұлданса, 6 ай ішінде өздеріне баспана сатып алу мүмкіндігі беріледі.

Бағдарлама қатысушыларының орташа жасы – 32, көбінің тұрақты табысы бар, бірақ баспана мәселесі әлі шешілмеген. 9 296 қатысушының баласы бар, 7 569-ы некеде, ал 8 690 адам тұрғын үй кезегінде тұр. 2 689 азамат әлеуметтік осал топтарға жатады.

Қатысушылардың орташа жинақ сомасы – 4,3 млн теңге. Жинақ шотын тұрақты толықтырған салымшылардың балдары жоғары болып, қатысу мүмкіндігі артқан. Биыл ең жоғары ұпай – 1 284,67 – алматылық Жанар Омарова жинаған.

Бағдарламаға балл беру тәртібі:

Депозит бойынша сыйақы – әр 1 000 теңгеге 1 балл;

Некенің болуы – 5 балл;

Баланың болуы – 10 балл;

Әлеуметтік осал топқа жату – 10 балл;

35 жасқа дейінгі қатысушы – 5 балл.

Бағдарламаның негізгі шарттары:

Бастапқы жарна – 20% бастап;

Несие мөлшерлемесі – әлеуметтік осал топтар мен кезекте тұрғандар үшін 7%, қалған азаматтар үшін 9%;

Несие мерзімі – 19 жылға дейін;

Тұрғын үй сатып алу: бастапқы нарықтағы пәтер немесе моноқалалар мен ауылдық жерлерде екінші нарықтағы тұрғын үй;

Несие сомасы – Алматы мен Астанада 36 млн, басқа өңірлерде 30 млн теңгеге дейін.

Қатысушылар өз жинақтарын тұрақты толықтырып, отбасы пакетін пайдаланып, депозиттегі қаражаты арқылы балдарын арттыра алады.