Тараз қаласында интернет-алаяқтарға көмектескен екі күдікті ұсталды, деп хабарлайды Jambylinfo.kz.

Жамбыл облысы полиция департаментінің киберқылмысқа қарсы іс-қимыл басқармасы жүргізген жедел-іздестіру іс-шараларының нәтижесінде азаматтардың жеке деректерін пайдаланып, SIM-карталарды заңсыз тіркеген екі адам анықталды. Күдіктілер осы әрекеті арқылы криптовалюта түрінде табыс тауып отырған.

Олардың пәтерін тінту барысында бірнеше ұялы телефон, ноутбук және SIM-карталар тәркіленді.

Алдын ала мәлімет бойынша, күдіктілер Telegram желісіндегі интернет-алаяқтардың топтарына қосылып, сол жерде жіберілген азаматтардың ЖСН деректеріне SIM-карталарды тіркеп отырған. Кейін бұл нөмірлерді алаяқтар азаматтарға хабарласып, түрлі қызмет өкілдері ретінде танысып, ақша алдап алу үшін пайдаланған.

Әрбір тіркелген SIM-карта үшін күдіктілерге 3–5 USDT көлемінде криптовалюта төленіп отырған.

Полиция азаматтарды күмәнді онлайн-жұмыстарға араласпауға және жеке деректерін бөгде адамдарға бермеуге шақырады.