Науқас 16 жастағы бозбала туғанынан бері дәрігерлердің бақылауында болған. Оның жүрегіндегі аорталық қақпақ қалыпты үш жармалы емес, екі жармалы болып қалыптасқан. Мұндай жағдайда жүрек қақпағы толық ашылып-жабылмай, қан айналымына кедергі келтіреді. Уақыт өте келе жасөспірімде ентігу мен шаршағыштық байқалып, күнделікті қозғалыс та қиынға соға бастаған.

Мамандар жүрекке жасалған арнайы тексеріс кезінде қақпақтан өту кезіндегі қан қысымының айырмасы 100 мм сынап бағанасына жеткенін анықтады.

Бұл -  қалыптыдан бірнеше есе жоғары көрсеткіш. Науқастың өміріне қауіп төнуіне байланысты дәрігерлер шұғыл түрде ота жасау туралы шешім қабылдады.

Күрделі операцияны орталықтың жетекші дәрігерлері - орталық басшысы, профессор Сейітхан Жошыбаев, балалар кардиохирургия бөлімінің меңгерушісі Икром Мұхамедов, бас дәрігер Алмас Әлібеков және басқа да тәжірибелі мамандар бірлесіп жүргізді.

Жасөспірімге Озаки әдісімен ота жасалды. Бұл – Жапонияда пайда болған және бүгінде дамыған елдерде кеңінен қолданылатын озық тәсіл. Оның ерекшелігі – жүрек қақпағы науқастың өз жүрек қабығынан (перикардтан) жасалып, қайта қалыптастырылады.

Операция сәтті өтіп, қақпақтағы қысым айырмасы 100-ден 6 мм сынап бағанасына дейін төмендеді. Жүректегі кері қан ағымы тоқтап, баланың жағдайы тұрақтанды. Енді ол қалыпты өмір сүрумен қатар, спортпен де айналыса алады.

Айта кету керек, мұндай жоғары технологиялық операциялар Міндетті әлеуметтік медициналық сақтандыру (МӘМС) жүйесі аясында тегін жасалады.